Müzəffər Azərbaycan Ordusunun şanlı Qələbəsi xalqımızın uzun illər qəlbində daşıdığı ağrının, ədalət və haqq mübarizəsinin təntənəsi oldu. Xocalı soyqırımı Azərbaycan tarixinin ən faciəli səhifələrindən biri kimi yaddaşlara həkk olunmuş, dinc əhaliyə qarşı törədilmiş ağır cinayət kimi beynəlxalq hüquq normalarının kobud şəkildə pozulmasının nümunəsinə çevrilmişdir. Bu faciə nəticəsində yüzlərlə günahsız insan amansızlıqla qətlə yetirilmiş, minlərlə soydaşımız öz doğma yurd-yuvasından didərgin salınmışdır.
Azərbaycan dövləti ötən illər ərzində Xocalı həqiqətlərinin dünya ictimaiyyətinə çatdırılması istiqamətində ardıcıl və məqsədyönlü siyasət həyata keçirmişdir. “Xocalıya ədalət” kampaniyası çərçivəsində aparılan beynəlxalq təbliğat işi, diplomatik səylər və siyasi təşəbbüslər nəticəsində bir sıra ölkələr və beynəlxalq təşkilatlar bu faciəni soyqırımı kimi tanımış, ona hüquqi-siyasi qiymət vermişdir. Bu, dövlətimizin prinsipial mövqeyinin və haqq səsinin beynəlxalq aləmdə getdikcə daha güclü eşidildiyinin göstəricisidir.
2020-ci ildə Müzəffər Ali Baş Komandanın rəhbərliyi ilə Azərbaycan Ordusunun həyata keçirdiyi Vətən müharibəsi nəticəsində torpaqlarımız işğaldan azad olundu, ölkəmizin ərazi bütövlüyü bərpa edildi. Bu Qələbə təkcə hərbi uğur deyil, həm də tarixi ədalətin bərpası idi. Xocalı şəhidlərinin və bütün şəhidlərimizin qisası döyüş meydanında alındı, onların ruhu qarşısında mənəvi borc yerinə yetirildi. Azərbaycan əsgəri yüksək peşəkarlıq, vətənpərvərlik və fədakarlıq nümayiş etdirərək tarix yazdı.
Bu gün azad olunmuş ərazilərdə genişmiqyaslı bərpa və quruculuq işləri həyata keçirilir. Dövlət proqramları çərçivəsində infrastruktur yenidən qurulur, şəhər və kəndlər müasir standartlara uyğun şəkildə bərpa edilir, keçmiş məcburi köçkünlərin doğma torpaqlarına qayıdışı təmin olunur. Bu proses həm də ədalətin və dövlət suverenliyinin real təntənəsidir.
Müzəffər Azərbaycan Ordusunun qəhrəmanlığı və dövlətimizin qətiyyətli siyasəti nəticəsində Xocalı şəhidlərinin qanı yerdə qalmadı. Bu, həm tarixi ədalətin bərpası, həm də gələcək nəsillər üçün güclü və müstəqil Azərbaycanın təminatıdır. Xocalı faciəsi heç vaxt unudulmayacaq, şəhidlərimizin əziz xatirəsi daim ehtiramla anılacaq və onların uğrunda can verdiyi Vətən əbədi olaraq yaşayacaqdır.
Gülnarə Fərəcova
Saatlı rayon Mərkəzi Kitabxananın əməkdaşı