Azərbaycan Almaniyanın fəal ticarət tərəfdaşıdır

Bildiyimiz kimi, aprelin 2-də Azərbaycan Respublikasının Prezidenti İlham Əliyev Almaniya Prezidenti Frank-Valter Ştaynmayerin ölkəmizə rəsmi səfəri zamanı mətbuata verdiyi bəyanat beynəlxalq aləmdə maraqla qarşılanmışdır. Prezident hazırda regionda mövcud olan vəziyyət, Azərbaycanla Ermənistan arasında sülh prosesinin perspektivləri, münasibətlərin normallaşdırılması, etimad mühitinin yaradılması və sülhün təsis edilməsi üçün vacib əhəmiyyət daşıyan məqamlar barədə qarşı tərəfə ətraflı məlumat verib. O, Azərbaycanla Ermənistan arasında sülh sazişi üzrə danışıqlarda Almaniyanın mövqeyini müsbət qiymətləndirib. Hazırda Azərbaycan dövlətinin həyata keçirdiyi enerji layihələri, regional inteqrasiyaya xidmət edən əməkdaşlıq formatları Cənubi Qafqazda sabitliyin təmin edilməsində mühüm rol oynayır. Bununla yanaşı, Azərbaycan dünyada sülhyaratma prosesində fəal iştirak edir, səmərəli təklif və təşəbbüslərlə çıxış edir, öz praktik fəaliyyəti ilə sülhün və təhlükəsizliyin möhkəmlənməsinə dəyərli töhfələr verir. Ermənistanın yalan və həqiqətdən uzaq iddialarla çıxış etdiyi, beynəlxalq ictimaiyyəti yalnış məlumatlandırmağa çalışdığı diqqətə çatdırılıb. Bildirilib ki, bu gün Qərbdəki bəzi dairələr Azərbaycanın guya Ermənistana hücum edəcəyi haqda absurd, yalan iddialar ortaya atır, lakin onların heç bir əsası yoxdur. Dövlətimizin rəhbəri Azərbaycan işğal altındakı ərazilərin ermənilər tərəfindən dağıdılması, azad olunduqdan sonra həmin torpaqlarda aparılan genişmiqyaslı bərpa və quruculuq işləri, Böyük Qayıdış proqramı, həmçinin Azərbaycanın irəli sürdüyü sülh prosesi barədə məlumat verib. Deyib ki, sülh sazişinin imzalanmasına heç bir maneə yoxdur. Almaniya Prezidenti razılıqla qeyd etmişdir ki, Azərbaycanda alman dilinə və Almaniyada təhsilə böyük maraq var. Azərbaycan gəncləri Almaniyada təhsil almağa böyük maraq göstərirlər və biz məhz elmi əməkdaşlıq sahəsində əlaqələrimizi genişləndirməliyik. Azərbaycanla Avropa İttifaqı ölkələri arasında münasibətlərin keyfiyyətcə yeni mərhələyə yüksəlməsində qarşılıqlı səfərlərin və imzalanan yeni müqavilələrin də böyük rolu var. Almaniya ilə Azərbaycan həm siyasi, həm də iqtisadi baxımdan rasional münasibət sərgiləyən iki tərəfdaş ölkədir. Eyni zamanda, iki ölkə arasında iqtisadi sahədə əlaqələr də getdikcə genişlənir. Hazırda Azərbaycan Almaniyanın regionda ən böyük ticarət tərəfdaşıdır. Xudayar SultanlıADPU Cəlilabad filialının direktoru