Beynəlxalq arenada əldə olunan idman uğurları Azərbaycanın son illərdə qazandığı mühüm nailiyyətlərdən biridir. Beynəlxalq yarışlarda idmançılarımız tərəfindən 2000-dən çox medalın, o cümlədən təqribən 600-dən artıq qızıl medalın qazanılması ölkədə idmanın yüksək səviyyədə inkişaf etdiyini bir daha sübut edir. Bu göstəricilər təsadüfi deyil və ardıcıl, məqsədyönlü dövlət siyasətinin, eləcə də idmana göstərilən xüsusi diqqət və qayğının məntiqi nəticəsidir. Keçən illərlə müqayisədə medalların sayının artması da bu sahədə aparılan işlərin düzgün istiqamətdə getdiyini aydın şəkildə nümayiş etdirir.
Azərbaycanda idmanın inkişafı dövlət siyasətinin prioritet istiqamətlərindən biri kimi müəyyənləşdirilmişdir. Müstəqillik illərindən etibarən ölkədə idman infrastrukturunun yaradılması və möhkəmləndirilməsi istiqamətində genişmiqyaslı layihələr həyata keçirilmişdir. Paytaxtla yanaşı, regionlarda da müasir idman kompleksləri, olimpiya mərkəzləri, stadionlar və məşq bazaları inşa olunmuş, gənclərin idmana cəlb edilməsi üçün əlverişli şərait yaradılmışdır. Bu infrastruktur idmançıların peşəkar şəkildə hazırlanmasına və beynəlxalq yarışlara yüksək səviyyədə hazırlaşmasına geniş imkanlar açmışdır.
Dövlət tərəfindən idmançılara göstərilən maddi və mənəvi dəstək onların motivasiyasını artıran əsas amillərdəndir. Uğur qazanan idmançıların və məşqçilərin mükafatlandırılması, sosial təminatının yaxşılaşdırılması, beynəlxalq yarışlara hazırlıq prosesinin sistemli şəkildə təşkili idmanın davamlı inkişafına güclü təkan verir. Bu diqqət və qayğı nəticəsində Azərbaycan idmançıları dünya və Avropa çempionatlarında, Olimpiya oyunlarında uğurla çıxış edərək ölkəmizin bayrağını yüksəklərdə dalğalandırırlar.
Əldə olunan çoxsaylı medallar Azərbaycan idmanının təkcə kəmiyyət deyil, həm də keyfiyyət baxımından inkişaf etdiyini göstərir. Müxtəlif idman növləri üzrə qazanılan uğurlar idman siyasətinin balanslı və düzgün qurulduğunu sübut edir. Güləş, cüdo, boks, taekvondo, karate, gimnastika və digər sahələrdə əldə edilən nəticələr ölkəmizin idman potensialının genişliyini nümayiş etdirir. Eyni zamanda qadın və gənclərin idmana daha fəal cəlb olunması gələcək uğurlar üçün möhkəm zəmin yaradır.
İdmanın inkişafı təkcə medal qazanmaqla məhdudlaşmır, həm də sağlam cəmiyyətin formalaşmasına xidmət edir. Gənclərin asudə vaxtının səmərəli təşkili, sağlam həyat tərzinin təbliği, vətənpərvərlik ruhunun gücləndirilməsi baxımından idmanın rolu əvəzsizdir. Bu baxımdan idman sahəsində həyata keçirilən dövlət siyasəti sosial və mənəvi dəyərlərlə sıx bağlıdır və cəmiyyətin ümumi inkişafına töhfə verir.
Nəticə etibarilə, beynəlxalq yarışlarda qazanılan minlərlə medal Azərbaycanın idman sahəsində əldə etdiyi böyük uğurların bariz göstəricisidir. Medalların ildən-ilə artması idmanın inkişafına göstərilən diqqətin, düzgün strategiyanın və ardıcıl dövlət dəstəyinin məntiqi nəticəsidir. Bu uğurlar ölkəmizin beynəlxalq nüfuzunu artırmaqla yanaşı, gənc nəslə stimul verir, onlarda inam və qürur hissi formalaşdırır. Azərbaycan idmanı gələcəkdə də yeni zirvələr fəth edərək ölkəmizi dünyada layiqincə təmsil edəcəkdir.
Rauf Salmanov
Saatlı rayon Heydər Əliyev Mərkəzinin əməkdaşı