Ənənəvi keçirilən anım mərasimi xalqın tarixi yaddaşının qorunmasına, şəhidlərin əziz xatirəsinin uca tutulmasına və milli-mənəvi dəyərlərin gələcək nəsillərə ötürülməsinə xidmət edən mühüm ictimai-siyasi tədbirdir. Xüsusilə Xocalı şəhidlərinin anım mərasimləri hər il dövlət səviyyəsində, geniş ictimaiyyətin iştirakı ilə böyük ehtiram və hüznlə qeyd olunur.
Bu mərasimlərdə Azərbaycan Respublikasının rəhbərliyi, dövlət və hökumət nümayəndələri, Milli Məclisin deputatları, hüquq-mühafizə orqanlarının əməkdaşları, ictimai təşkilatlar, şəhid ailələri və qazilər iştirak edirlər. Tədbir zamanı şəhidlərin xatirəsi bir dəqiqəlik sükutla yad edilir, abidə kompleksləri ziyarət olunur, önünə əklil və gül dəstələri qoyulur.
Anım mərasimləri təkcə hüzn xarakteri daşımır, eyni zamanda milli birliyin, vətənpərvərliyin və dövlətə sədaqətin nümayişinə çevrilir. Çıxış edənlər Xocalı faciəsinin tarixi-siyasi mahiyyətindən, xalqımıza qarşı törədilmiş cinayətlərin beynəlxalq hüquq müstəvisində qiymətləndirilməsinin vacibliyindən bəhs edir, Müzəffər Azərbaycan Ordusunun Qələbəsi nəticəsində tarixi ədalətin bərpa olunduğunu vurğulayırlar.
Ənənəvi anım mərasimləri gənc nəslin vətənpərvər ruhda tərbiyə olunmasında xüsusi rol oynayır. Təhsil müəssisələrində keçirilən xüsusi dərslər, sərgilər, ədəbi-bədii kompozisiyalar və sənədli filmlər vasitəsilə Xocalı həqiqətləri şagird və tələbələrə çatdırılır. Bu, milli yaddaşın qorunmasına və gələcək nəsillərin tarixini unutmamasına xidmət edir.
Beləliklə, hər il keçirilən anım mərasimləri xalqımızın şəhidlərə olan sonsuz ehtiramının ifadəsi olmaqla yanaşı, dövlətimizin gücünü, birliyini və tarixi ədalətə sadiqliyini nümayiş etdirən mühüm ictimai hadisə kimi dəyərləndirilir.
Ruhiyyə Baxşıyeva
Saatlı rayon Mərkəzi Kitabxananın əməkdaşı