Ermənistanın Azərbaycana qarşı mina terroru hələ də davam edir. İşğaldan azad olunmuş ərazilərimizdə ötən 8 gün ərzində 4 mina hadisəsi qeydə alınıb. Bu, işğalçının 30 ildən artıq müddətdə həyata keçirdiyi mina siyasətinin hələ də davam etdiyini göstərir.
İşğal dövründə Ermənistan silahlı qüvvələri Azərbaycan torpaqlarını sistemli şəkildə minalarla çirkləndirib. Hazırda da bu minalar vətəndaşlarımızın həyatına son qoyur. 2020-ci ilin noyabrından indiyədək minaların partlaması nəticəsində 70 nəfər həyatını itirib, 311 nəfər ağır yaralanıb.
İlkin hesablamalara görə, Azərbaycan torpaqlarına Ermənistan tərəfindən basdırılmış minaların sayı 1,5 milyondan çoxdur. Azərbaycan dünyada mina ilə ən çox çirklənmiş 5-ci ölkədir. Ermənistanın işğalı zamanı ərazilərimizdə 1 milyon 166 min 702 hektar ərazinin minalandığı güman edilir. Bu ərazilərin 211 min 800 hektarı yüksək, 954 min 902 hektarı isə orta səviyyəli çirklənməyə məruz qalıb. İndiyə qədər 140 min hektardan çox ərazi minalardan təmizlənib. Minatəmizləmə işlərinə 349,1 milyon dollar vəsait xərclənib ki, bunun da yalnız 16,1 milyon dolları beynəlxalq mənbələrdən daxil olub.
Minatəmizləmə işlərini başa çatdırmaq üçün ümumilikdə 25 milyard ABŞ dolları tələb olunur. Bu işləri isə 30 ilə yaxın bir müddətdə yekunlaşdırmağın mümkünlüyü təxmin edilir.
Vəliyeva Südabə
Saatlı Dövlət Rəsm Qalereyasının direktoru