Fəal əməkdaşlıq üçün yaxşı imkanlar mövcuddur

Prezident İlham Əliyevin cari ilin 2 aprel tarixində Almaniya Federativ Respublikasının Prezidenti Frank-Valter Ştaynmayerin ölkəmizə rəsmi səfəri çərçivəsində mətbuata verdiyi bəyanatda cənab İlham Əliyev Almaniya Prezidentinin Azərbaycana səfərini yüksək qiymətləndirərək, bu səfərin iki ölkə arasındakı əlaqələrə müsbət təkan verəcəyinə tam əmin olduğunu vurğulayıb. Ölkə Prezidenti görüşdə deyib ki, Azərbaycan Almaniya ilə əlaqələrin inkişafında maraqlıdır. Rəqəmlər də bundan xəbər verir. Bu ilin yanvar-fevral ayların da iki ölkə arasında ticarət dövriyyəsi üç dəfə artıb. Almaniya Azərbaycanın enerji resurslarının Avropaya nəqlində maraqlıdır. Bunu Almaniya Prezidenti Bakıda bir daha təsdiq etdi. Azərbaycan Almaniyanın Cənubi Qafqazda ən mühüm iqtisadi və ticarət tərəfdaşıdır. Alman iş adamları tərəfindən Azərbaycanda iqtisadi islahatlarla bağlı böyük işlərin həyata keçirildiyinin etiraf edilməsi real vəziyyətə obyektiv qiymətin verilməsidir. Digər mühüm məqam ölkələrimizin təkcə ənənəvi enerji sektorunda deyil, başqa sahələrdə də əməkdaşlıq üçün yaxşı imkanların yaranmasının qeyd olunmasıdır. Bildiyimiz kimi, keçən il Azərbaycan COP29 beynəlxalq iqlim konfransına ev sahibliyi etmişdir. Bu istiqamət üzrə də bizim Almaniya ilə çox fəal əməkdaşlığımız olub. COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu konfrans böyük, uğurlu nəticələrlə zəngin idi. İştirak etməyən yeganə ölkə Ermənistan olmuşdur. Bu da təbii olaraq təəssüf hissi doğurur. Çünki xüsusilə indiki şəraitdə – Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi başadüşülən deyildi. Onu da qeyd edək ki, Almaniya Prezidentinin Ermənistana səfəri çərçivəsində Ştaynmayerin İnstaqram səhifəsində Qarabağ separatçılarının “bayrağı”nın yayımlanması Azərbaycanda haqlı etiraza səbəb oldu. Berlin bu hadisəyə görə dərhal Azərbaycandan üzr istədi, Almaniya Prezidentinin səhifəsində texniki səhvə yol verildiyi və həmin səhvin düzəldiyi açıqlandı. Berlinin üzr istəməsi Azərbaycan üçün kifayət idi. Frank-Valter Ştaynmayer Almaniyanın Azərbaycanın ərazi bütövlüyünü dəstəklədiyini və Qarabağın Azərbaycana aid olduğunu təsdiq etdi. Əminik ki, Almaniya ilə Azərbaycan arasındakı dərin tarixi dostluq hər iki ölkənin xalqlarının rifahı, sülh və əminamanlıq üçün əlaqələrin daha da möhkəmləndirilməsinə xidmət edəcəkdir.Rafiq AğayevYeni Azərbaycan PartiyasıCəlilabad Rayon Təşkilatının sədr müavini