Vətən müharibəsi Azərbaycan xalqının müasir tarixində milli birlik və həmrəyliyin ən parlaq təcəssümü kimi yadda qaldı. 44 gün davam edən bu müqəddəs savaş təkcə hərbi qələbə deyil, eyni zamanda xalq–iqtidar–ordu birliyinin sarsılmazlığını bütün dünyaya nümayiş etdirdi. Müharibənin ilk günlərindən etibarən Azərbaycan cəmiyyətinin bütün təbəqələri – gənclər və yaşlılar, şəhər və kənd sakinləri, ziyalılar və sadə vətəndaşlar bir amal ətrafında birləşərək Prezident, Ali Baş Komandan İlham Əliyevin ətrafında sıx səfərbər oldular.
Prezident İlham Əliyevin qətiyyətli və prinsipial rəhbərliyi Vətən müharibəsində qazanılan Zəfərin əsas amillərindən biri oldu. Dövlət başçısı Ali Baş Komandan kimi həm hərbi, həm də siyasi müstəvidə düzgün və çevik qərarlar qəbul edərək ölkənin milli maraqlarını yüksək səviyyədə qorudu. Onun beynəlxalq hüquqa əsaslanan mövqeyi, informasiya müharibəsində apardığı ardıcıl və məntiqli çıxışları Azərbaycanın haqq işini dünya ictimaiyyətinə çatdırdı və düşmənin yalanlarını ifşa etdi.
Vətən müharibəsi dövründə xalqın Prezidentə olan inamı və etimadı xüsusilə aydın şəkildə özünü göstərdi. Azərbaycan vətəndaşları dövlət başçısının çağırışlarına dəstək verdi, ordumuza mənəvi dayaq oldu, cəbhə və arxa cəbhə anlayışı arasında sərhəd qalmadı. Minlərlə könüllü gənc Vətən uğrunda döyüşməyə hazır olduğunu nümayiş etdirdi, cəmiyyətin bütün resursları bir məqsədə – torpaqlarımızın azadlığına səfərbər edildi.
Bu müharibə həm də sübut etdi ki, Azərbaycan güclü dövlətçilik ənənələrinə, möhkəm siyasi iradəyə və yüksək vətənpərvərlik ruhuna malik ölkədir. Xalq və dövlət birliyi nəticəsində əldə olunan tarixi Qələbə uzun illər işğal altında qalan torpaqlarımızın azad olunması ilə nəticələndi və ölkəmizin ərazi bütövlüyü bərpa edildi. Bu Zəfər Prezident İlham Əliyevin rəhbərliyi altında həyata keçirilən məqsədyönlü siyasətin, ordunun peşəkarlığının və xalqın sarsılmaz birliyinin məntiqi yekunu oldu.
Nəticə etibarilə, Vətən müharibəsi Azərbaycan xalqının hər zaman öz Liderinin – Prezident, Ali Baş Komandan İlham Əliyevin ətrafında sıx birləşdiyini, dövlət maraqları naminə birlik və həmrəylik nümayiş etdirməyə qadir olduğunu bir daha təsdiqlədi. Bu birlik və həmrəylik gələcəkdə də ölkəmizin güclənməsinin, davamlı inkişafının və milli maraqlarının təmin olunmasının əsas təminatçısıdır.
Saatlı rayon Mərkəzləşdirilmiş Kitabxana Sisteminin direktoru
İbrahim Xıdırov