Azərbaycanlı jurnalist, “Global Media Group”un media direktoru Həmid Həmidov Sumı Dövlət Universitetinin (Ukrayna) tələbə və müəllimləri üçün mühazirə oxuyub.
Oxu.Az-ın məlumatına görə, onlayn görüş çərçivəsində Həmid Həmidov “Müharibə dövründə media sektorunda Ukrayna-Azərbaycan əməkdaşlığı” mövzusunda çıxış edib.
Moderator Ukrayna-Azərbaycan layihələrinin kuratoru, jurnalist Marina Qonçaruk olub.
Onlayn görüşü giriş sözü ilə tarix elmləri namizədi, Sumı Dövlət Universitetinin tarix kafedrasının dosenti Anatoli Qonçarenko açaraq, Ukrayna-Azərbaycan dialoqu tarixinin maraqlı səhifələrindən, tələbələrlə Azərbaycanın ictimai rəy liderləri arasında ünsiyyətin vacibliyindən danışıb. Onun sözlərinə görə, bu, tələbələrə Ukraynanı hər cür dəstəkləyən dost xalq haqqında daha çox məlumat əldə etməyə imkan verəcək, həmçinin onların Ukrayna-Azərbaycan sektoruna inteqrasiyasına imkan yaradacaq.
Həmid Həmidov Ukrayna ilə Azərbaycan arasında media və jurnalistika sahəsində əməkdaşlığın inkişafından danışıb, bu prosesin son illər daha da intensivləşdiyini və daha məhsuldar inkişaf etdiyini bildirib.
Mediaholdinqin direktoru Azərbaycanın dezinformasiyaya qarşı mübarizə təcrübəsindən, eləcə də müharibə dövründə beynəlxalq media platformaları ilə əməkdaşlıqdan danışıb.
“2020-ci ildə Qarabağ müharibəsi zamanı ukraynalılar Ukrayna mediasında şərhlər verən bir çox azərbaycanlı ekspertləri, jurnalistləri, rəsmiləri tanıdılar, eyni zamanda, bizdə də Ukrayna cəmiyyətinin rəy liderlərinin məlumatlarına maraq var. Hesab edirəm ki, ölkələrimizin ekspert icması ilə jurnalistləri arasında əməkdaşlıq, ilk növbədə, şəxsi təmaslar və əməli fəaliyyətlər, birgə və sistemli layihələr üzərində qurulub”, – deyə Həmid Həmidov bildirib.
Media direktoru Azərbaycan ətrafında geosiyasi vəziyyətlə maraqlanan tələbə və müəllimlərin suallarını da cavablandırıb.
Tədbirdə Sumı Dövlət Universitetinin tələbələri və professor-müəllim heyəti iştirak edib.
