Meksikanın nüfuzlu universitetlərinin birində hazırda Cənubi Qafqaz regionunda baş verən hadisələrdən bəhs edilib.
Bu barədə Azərbaycanın Meksikadakı səfirliyindən məlumat verilib.
Bildirilib ki, ölkəmizin Meksikadakı səfiri Məmməd Talıbov Meksikanın ən qabaqcıl və nüfuzlu ali təhsil müəssisəsi olan Monterrey Texnoloji İnstitutunun Sosial Elmlər və Hökumət fakültəsində “Münaqişə və danışıqlar” proqramı üzrə təhsil alan tələbələrlə görüşüb.
Keçmiş münaqişə və regionun reallıqları barədə geniş təqdimatla çıxış edən diplomat erməni təcavüzünün tarixi, 30 illik işğal dövründə ölkəmizin qarşılaşdığı çətinliklər, üzləşdiyi ikili standartlar, daha sonra 44 günlük müharibə və nəticələri, regiondakı yeni reallıqlar, davam edən sülh prosesi, eləcə də, ölkəmizdə aparılan genişmiqyaslı bərpa-quruculuq işləri, məcburi köçkünlərin qayıdışının təhlükəsiz şəkildə həyata keçirilməsi haqda məlumat verib.
Konfransda, həmçinin, sentyabrın 19-da Azərbaycan Respublikasının Silahlı Qüvvələri tərəfindən Qarabağ iqtisadi rayonunda keçirilən lokal xarakterli antiterror tədbirləri və onun nəticələri, Qarabağda qondarma cinayətkar rejimin özünü buraxması nəticəsində Azərbaycanın suverenliyinin tam bərpa edilməsi, habelə Qarabağın erməni sakinlərinin reinteqrasiyası prosesi barədə məlumat verilib.
Bundan əlavə, Meksika ilə Azərbaycan arasındakı ikitərəfli əlaqələr, ölkələrimiz arasında mədəniyyət, turizm və digər sahələrdə əməkdaşlıq imkanlarının genişləndirilməsi, eləcə də xarici tələbələr üçün ölkəmizdə mövcud olan təhsil imkanları, təcrübə və təqaüd proqramları barədə məlumat verilib, həmçinin, auditoriya tərəfindən ünvanlanan suallar cavablandırılıb.
