“Bir Azərbaycan vətəndaşı və eyni zamanda məcburi köçkün kimi Sinan Oğanın Rəcəb Tayyib Ərdoğana dəstəyini alqışlayıram. Ona təşəkkür edirəm ki, Türkiyə xalqı üçün doğru seçimi təhlil edə bildi və qərar verdi”.
Bu sözləri Oxu.Az-a Milli Məclisin deputatı Elman Məmmədov deyib. Xocalı rayonunu parlamentdə təmsil edən millət vəkili Türkiyə Prezidenti Rəcəb Tayyib Ərdoğanın Azərbaycan xalqının və Azərbaycan dövlətinin dostu olduğunu vurğulayıb:
“44 günlük Vətən müharibəsi zamanı torpaqlarımızın işğaldan azad olunmasında Rəcəb Tayyib Ərdoğanın şəxsən özünün və onun rəhbərlik etdiyi Türkiyə dövlətinin dəstəyini hər zaman hiss etdik. Bizə mənəvi və siyasi dayaq oldular. Ona görə hesab edirəm ki, biz sözümüzlə, fikrimizlə Ərdoğanın yanında olmalıyıq. Sinan Oğanın da məhz bu niyyətlə onu dəstəkləməsi doğru addımdır.
Rəcəb Tayyib Ərdoğan bütün türk dünyasının dostudur. Türk dövlətlərinin birliyi, güclü olması, dünyada söz sahibinə çevrilməsi, uğurlu gələcəyi üçün nəzərdə tutulan layihələr mövcuddur. Bu layihələrin həyata keçirilməsi, türk dünyasının inkişafı üçün Ərdoğanın yenidən prezident seçilməsi vacibdir.
Biz Türkiyədəki seçkilərə, təbii ki, qarışa bilmərik. Amma region dövləti olduğuna görə bizimlə dostluq və qardaşlıq əlaqələri, bundan sonra münasibətlərin necə inkişaf edəcəyi də önəmlidir. 20 il bundan öncəki Türkiyə ilə indiki Türkiyə arasındakı böyük fərq göz qabağındadır. Türkiyə aqrar ölkədən nəhəng sənaye ölkəsinə çevrilib. Eyni zamanda, özünün hərbi sənayesi və gücü ilə dünyada öncül yeri tutub. Bütün bunlar Ərdoğan və komandasının nailiyyətidir. Mən əminəm ki, Türkiyə xalqı növbəti dəfə dövlətin inkişafına aparan doğru seçimi edəcək”.
Aysel Aslan
