Azərbaycan son illərdə bərpaolunan enerji sahəsinin inkişafını dövlət siyasətinin əsas istiqamətlərindən birinə çevirib. Günəş, külək və su elektrik enerjisinin istehsalının artırılması həm ölkənin enerji təhlükəsizliyini möhkəmləndirir, həm də beynəlxalq əməkdaşlıq üçün yeni imkanlar yaradır. Bu baxımdan Avropa Komissiyası ilə aparılan müzakirələr xüsusi əhəmiyyət daşıyır.
Keçirilən görüş zamanı Azərbaycanın Günəş, külək və su elektrik enerjisi potensialı, həmçinin mövcud və gələcək ötürmə xətləri geniş şəkildə müzakirə olunub. Bu sahədə tərəflərin strateji tərəfdaş kimi əməkdaşlıq edə biləcəyi vurğulanıb. Azərbaycanın əlverişli coğrafi mövqeyi və zəngin təbii resursları ölkəmizi yaşıl enerji sahəsində etibarlı tərəfdaşa çevirir.
Azərbaycan artıq bu istiqamətdə mühüm addımlar atıb. Xarici və yerli şirkətlərlə imzalanmış müqavilələrə əsasən, növbəti beş-altı il ərzində ölkədə səkkiz giqavat həcmində Günəş və külək enerjisinin istehsalı nəzərdə tutulur. Bu göstərici yalnız bağlanmış müqavilələri əhatə edir və onların həyata keçirilməsi qarşıya qoyulan məqsədlərin reallaşacağını göstərir.
Bununla yanaşı, gələcəkdə yeni layihələrin həyata keçirilməsi və əlavə investisiyaların cəlb olunması nəticəsində bərpaolunan enerji istehsalının daha da artacağı gözlənilir. Yeni elektrik ötürmə xətlərinin tikintisi istehsal olunan enerjinin həm daxili tələbatın ödənilməsinə, həm də xarici bazarlara ixracına imkan yaradacaq. Bu isə Azərbaycanın Avropanın enerji təhlükəsizliyinə töhfəsini daha da artıracaq.
Yaşıl enerji sahəsində əməkdaşlığın genişlənməsi ölkəmizin iqtisadi inkişafına, ətraf mühitin qorunmasına və dayanıqlı gələcəyin qurulmasına mühüm töhfə verir. Bu istiqamətdə həyata keçirilən layihələr Azərbaycanın beynəlxalq nüfuzunu gücləndirir və ölkəmizi regionun aparıcı yaşıl enerji mərkəzlərindən birinə çevirmək üçün möhkəm zəmin yaradır.
Telman Ağayev
Saatlı rayon Heydər Əliyev Mərkəzinin direktoru