Elm Yayma Vəqfi və Dünya Etnoidman Konfederasiyasının sədri Bilal Ərdoğan Azərbaycana gəlib.
Bu barədə Türkiyənin Azərbaycandakı səfirliyindən məlumat verilib.
Bildirilib ki, Bilal Ərdoğan Türkiyə Dəyanət Vəqfi Bakı Türk Liseyini və Azərbaycan İlahiyyat İnstitutunu ziyarət edib. Qonaq hər iki təhsil müəssisəsində şagird və tələbələr tərəfindən coşqu ilə qarşılanıb.
Qonaq əvvəlcə Türkiyə Dəyanət Vəqfi Bakı Türk liseyində olub. Liseyin konfrans zalında 27 Sentyabr – Anım Günü münasibəti ilə tədbir təşkil edilib və fəxri qonaqla görüş keçirilib.
Tədbirdə Vətənimizin azadlığı uğrunda canlarından keçən şəhidlərimizin ruhu bir dəqiqəlik sükutla yad edilib. Azərbaycan Respublikasının Dövlət Himni və Türkiyə Cümhuriyyətinin İstiqlal marşı səsləndirilib.
Daha sonra Vətənimizin azadlığı uğrunda əziz canlarından keçən şəhidlərimizin ruhuna Türkiyə Cümhuriyyəti Diyanət İşləri Başqanlığı Müshəf Tədqiqləri və Qiraət şurasının üzvü Fatih Okumuş tərəfindən Qurani-Kərimdən ayələr tilavət edilib.
Türkiyə səfirliyinin dini işlər üzrə müşaviri İhsan Açık tədbirin təşkili üçün məktəb kollektivinə təşəkkür edib və qonağa öz dəyərli vaxtını ayırıb şagirdlərlə görüşə gəldiyi üçün öz minnətdarlığını bildirib.
Daha sonra Bilal Ərdoğan ona ünvanlanan sualları cavablandırıb. Qonaq ilk oxuduğu kitab, məktəb və ilk müəllimləri haqqında ünvanlanan sualları cavablandıraraq şagirdlər tərəfindan maraqla dinlənilib. O, eyni zamanda, övladının Quran hafizi olmasından və hafizliyin dəyərindən danışıb. Təhsilin insan həyatındakı önəminə diqqət çəkən Bilal Ərdoğan modern dünyanın ən böyük silahının güclü təhsil olduğunu qeyd edib. Ən çox sevdiyi idman növü barədə suala isə qonaq “oxçuluq” cavabını verib və oxçuluğun tarixindən danışıb. O, eyni zamanda, milli kimliyin əhəmiyyətindən də bəhs edib.
Tədbirdə şagirdlərin ifasında şəhidlərə həsr edilmiş şeirlər dinlənilib.
Tədbirin sonunda məktəb rəhbərliyinə qonaqlar tərəfindən xatirə hədiyyələri təqdim edilib və xatirə şəkilləri çəkilib.
Daha sonra Bilal Ərdoğan Azərbaycan İlahiyyat İnstitutunu ziyarət edib. İnstitutun rektoru Aqil Şirinov tərəfindən qarşılanan qonağa universitetin fəaliyyəti, tələbələrə yaradılan imkanlar haqqında geniş məlumat verilib. Daha sonra institutun konfrans zalında tələbə və akademik müəllim heyəti ilə görüş keçirilib.
Tədbirin açılış qismində 27 Sentyabr – Anım Günü münasibəti ilə Vətənimizin azadlığı uğrunda əziz canlarından keçən şəhidlərimizin ruhuna Fatih Okumuş tərəfindən Qurani-Kərimdən ayələr tilavət edilib.
Azərbaycan İlahiyyat İnstitutunun rektoru Aqil Şirinov çıxış edərək dəyərli qonağı salamlayıb, Anım Gününün əhəmiyyətindən bəhs edib, şəhidlərimizə rəhmət diləyib.
O, eyni zamanda, qonaqlara institutun uğurlu fəaliyyətindən bəhs edib və iki dövlət arasındakı əlaqələrin inkişafına hər zaman töhfə verəcəklərini qeyd edib.
Tədbirdə çıxış edən İhsan Açık tədbirin təşkili üçün institut kollektivinə öz təşəkkürünü bildirib. O, içərisində olduğumuz günlərin əhəmiyyətindən bəhs edib. Şəhidlərin unudulmaması üçün dəyərli liderlərə ehtiyac olduğunu vurğulayıb və qonağa öz dəyərli vaxtını ayırıb tələbələrlə görüşə gəldiyi üçün öz təşəkkürünü bildirib.
Daha sonra Bilal Ərdoğan ona ünvanlanan sualları cavablandırıb. Bilal Erdoğan özünün uşaqlıq və dünyanın ən nüfuzlu universitetlərindəki tələbəlik illərindən danışaraq tələbələrlə öz təcrübəsini paylaşıb. O, eyni zamanda, tələbələrə öz sahələrində yaxşı mütəxəssis olmalarını və çox çalışmalarını tövsiyə edib. Elmin son dövrlər Avropadan Şərqə doğru inteqrasiya etdiyini vurğulayan natiq Əziz Səncərlərin, Selçuk Bayraktarların bu həqiqətin ən bariz nümunəsi olduğunu qeyd edib.
Tədbirin sonunda institut rəhbərliyinə və qonaqlara qarşılıqlı xatirə hədiyyələri təqdim edilib və xatirə şəkilləri çəkilib.
