İkinci Qarabağ müharibəsi zamanı Şuşanın azad edilməsi Azərbaycanın qarşıya qoyduğu əsas məqsədlərdən biri idi. Prezident İlham Əliyev müharibənin ilk günlərindən Şuşanın ölkəmiz üçün xüsusi tarixi, mədəni və mənəvi əhəmiyyət daşıdığını vurğulayır, bu şəhər üzərində nəzarətin bərpasını qələbənin mühüm şərtlərindən biri kimi qiymətləndirirdi. Onun səsləndirdiyi “Şuşasız bizim işimiz yarımçıq qalar” fikri həmin dövrdə qarşıya qoyulan məqsədin mahiyyətini ifadə edirdi.
44 gün davam edən Vətən müharibəsi ərzində Azərbaycan Ordusu müxtəlif istiqamətlərdə irəliləyərək qarşıya qoyulan hərbi vəzifələri yerinə yetirməyə çalışdı. Şuşaya doğru aparılan əməliyyatlar mürəkkəb relyef və çətin döyüş şəraiti ilə müşayiət olunurdu. Şəhərin coğrafi mövqeyi və strateji əhəmiyyəti onun azad edilməsi istiqamətindəki əməliyyatları xüsusi çətinləşdirirdi. Buna baxmayaraq, Azərbaycan hərbçiləri yüksək hazırlıq, əzmkarlıq və fədakarlıq nümayiş etdirərək hədəfə doğru irəlilədilər.
Nəhayət, 2020-ci il noyabrın 8-də Şuşanın azad edilməsi xəbəri ictimaiyyətə çatdırıldı. Bu hadisə müharibənin gedişində mühüm dönüş nöqtələrindən biri oldu və Azərbaycan tarixində xüsusi yer tutdu. Uzun illər ərzində xalqın yaddaşında yaşayan Şuşaya qovuşmaq arzusu həmin gün gerçəkləşdi. Şəhərin azad olunması hərbi nəticələrlə yanaşı, onun milli-mədəni irsimizdəki yeri baxımından da böyük əhəmiyyət daşıdı.
Saatlı rayon Heydər Əliyev Mərkəzinin əməkdaşı Hüseyn Eynullayev