2022-ci il 10 may tarixində Azərbaycan Respublikası Dövlət Neft Şirkəti (SOCAR) Bakı Ali Neft Məktəbində (BANM) ümummilli lider Heydər Əliyevin anadan olmasının 99-cu ildönümünə həsr olunmuş konfrans təşkil edib.
Bu barədə SOCAR məlumat yayıb.
Bildirilib ki, tədbirdə SOCAR-ın rəhbər heyəti, BANM-in müəllim və tələbə kollektivi iştirak edib.
Konfransın iştirakçıları əvvəlcə ümummilli lider Heydər Əliyevin büstü önünə gül dəstələri düzüb, onun əziz xatirəsini hörmət və ehtiramla yad ediblər.
SOCAR-ın prezidenti vəzifəsini müvəqqəti icra edən Rövşən Nəcəf çıxış edərək həyatını xalqımızın rifahının yüksəldilməsinə həsr edən ümummilli liderin həm Sovet hakimiyyəti, həm də müstəqillik illərində Azərbaycanın hərtərəfli inkişafı naminə misilsiz xidmətlərindən danışıb.
Məhz ümummilli lider Heydər Əliyev tərəfindən 1969-1982-ci illərdə Azərbaycanda neft sənayesinin də inkişafı üçün genişmiqyaslı fəaliyyətin həyata keçirildiyini söyləyən Rövşən Nəcəf müstəqillik illərində ulu öndərin müəyyənləşdirdiyi inkişaf konsepsiyasının əsas istiqamətlərindən birinin də milli neft strategiyası olduğunu vurğulayıb.
Rövşən Nəcəf bildirib ki, gələcək nəsillərimizin bu təbii sərvətimizdən faydalanmasının təmin olunması ulu öndərin neft strategiyasının əsas istiqamətlərindən idi. Bu missiya ümummilli liderin layiqli davamçısı Prezident İlham Əliyev tərəfindən uğurla icra olundu. 2003-cü ildən sonrakı dövrdə milli strategiya dövlətimizin başçısı tərəfindən günün tələblərinə uyğun şəkildə formalaşdırılaraq davam etdirilir.
Daha sonra çıxış edən SOCAR-ın birinci vitse-prezidenti Xoşbəxt Yusifzadə ulu öndər Heydər Əliyev ilə bağlı xatirələrindən, dünyanın qabaqcıl ölkələri və şirkətləri ilə “Əsrin müqaviləsi”nə dair aparılan danışıqlardan bəhs edərək bildirib ki, həmin müzakirələrin uğurla yekunlaşmasında Azərbaycan nümayəndə heyətinin rəhbəri cənab İlham Əliyevin diplomatik məharəti və peşəkarlığı xüsusi rol oynayıb.
O, həmçinin çıxışında Azərbaycan neftçilərinin daim ulu öndər Heydər Əliyevin xüsusi diqqət və qayğısı ilə əhatə olunduqlarını bildirib. Qeyd edib ki, ümummilli lider Azərbaycanda neft sahəsində peşəkar kadrların formalaşmasını daim diqqət mərkəzində saxlayıb və bu istiqamətdə zəruri addımlar atıb.
Bakı Ali Neft Məktəbinin rektoru Elmar Qasımov Ümummilli Liderin mənalı həyat yolundan, zəngin və çoxşaxəli irsindən danışaraq vurğulayıb ki, ulu öndər Heydər Əliyevin əsasını qoyduğu siyasətin Prezident İlham Əliyev tərəfindən zamanın tələblərinə, dövrün ictimai-siyasi qanunauyğunluqlarına müvafiq şəkildə davam etdirilməsi nəticəsində milli tərəqqinin Azərbaycan nümunəsi adlı fenomen yaranıb.
Ümummilli liderimizin ölkəmizdə gənc nəslin vətənpərvərlik ruhunda formalaşması istiqamətlərindəki xidmətlərindən bəhs edən 700 bal toplayaraq BANM-ə qəbul olmuş, Prezident təqaüdçüsü, 5-ci kurs tələbəsi Mahirə Əsədzadə isə çıxışında müasir gəncliyimizin ulu öndər Heydər Əliyevin qurub-yaratdığı müstəqil ölkəmizin daha da qüdrətlənməsi naminə “Dəmir yumruq” ətrafında sıx birləşdiyini diqqətə çatdırıb.
Sonda ulu öndər Heydər Əliyevin neft strategiyası və onun uğurlu nəticələrindən bəhs edən videoçarx nümayiş olunub.
