Son vaxtlar Qazaxıstan-Azərbaycan münasibətlərində iri infrastruktur layihələrinin həyata keçirilməsi məsələsində mühüm mərhələ başlayıb. Odur ki, Tokayevin Azərbaycana səfəri ikitərəfli münasibətlərin inkişafına yeni təkan verəcək. Qazaxıstanın təbii müttəfiqi və türk dünyasının əsas ölkələrindən biri olan Azərbaycanla ticari-iqtisadi əlaqələrin inkişafı strateji əhəmiyyət kəsb edir. Bu səbəbdən də heç təsadüfi deyil ki, hərtərəfli, geniş miqyaslı münasibətlərin qurulması nəzərdə tutulur. Burada əsas məqamlardan biri ölkələr arasında qarşılıqlı iqtisadi, ticari əlaqələrin gücləndirilməsidir. Burada 1 milyard dollardan söhbət gedir.
Qazaxıstan Prezidentinin Azərbaycana səfər etməsi və Azərbaycanla-Qazaxıstan arasında bəyannamənin imzalanması bu iki dövlət arasında olan iqtisadi, siyasi və mədəni anlamda növbəti mərhələyə daşımış oldu. Görüş əsnasında bir çox məsələlərə toxunuldu. Lakin bizim üçün təqdir olunan hal ondan ibarətdir ki, Qazaxıstan Füzulidə uşaqlar üçün tikilən yaradıcılıq məktəbinin tikilməsinə birbaşa sponsorluq edir. Həmçinin Qazaxıstan neftinin birbaşa ixracı üçün müzakirələr aparılır ki, gələcəkdə Qazaxıstan neftinin həm Tbilisi-Ceyhan, həm də Bakı-Supsa vasitəsilə ixracat potensialı mümkündür.
Qazaxıstan Prezidenti qardaş Azərbaycanın ərazi bütövlüyünün bərpasını təkcə sözdə deyil, həm də əməldə dəstəklədiyini və yeni Azərbaycanın quruculuğuna töhfə verməyə hazır olduğunu vurğulayıb: “Belə ki, Azərbaycanda ərazi bütövlüyü bərpa edildikdən sonra faktiki olaraq dövlətçiliyin inkişafında yeni mərhələ başlayıb”.
Müasir beynəlxalq münasibətlər sisteminin reallıqlarına gəldikdə isə Azərbaycan və Qazaxıstan arasında imzalanan “Azərbaycan Respublikası ilə Qazaxıstan Respublikası arasında strateji münasibətlərin möhkəmləndirilməsi və müttəfiqlik qarşılıqlı fəaliyyətinin dərinləşdirilməsi haqqında Bəyannamə” iki qardaş ölkənin gələcək təhlükəsizlik və əməkdaşlıq perespektivləri baxımından mühüm əhəmiyyət kəsb edən strateji sənəddir. Birgə Bəyannamə haqqında danışan dövlətimizin başçısı bu sənəddə Azərbaycanın Mərkəzi Asiyanın beş ölkəsi ilə çoxtərəfli əməkdaşlığının gələcəkdə mümkün inkişafının da əksini tapdığını bildirib. Biz xarici siyasətdə iştirak etdiyimiz aparıcı beynəlxalq təşkilatlarda geniş əhatəli məsələlər üzrə fəal əməkdaşlıq edirik, daim bir-birimizi dəstəkləyirik və bu, gələcəkdə də davam edəcək. Çünki əməkdaşlıq etdiyimiz beynəlxalq təşkilatların sayı kifayət qədər çoxdur və hər yerdə Qazaxıstan və Azərbaycan nümayəndələri sıx, qarşılıqlı fəaliyyətdədirlər.
İqtisadi-ticari münasibətlərin inkişafına da təkan veriləcək. Cari ilin birinci rübündə ölkələr arasında ticarət dövriyyəsi keçən ilki göstərici ilə müqayisədə 3 dəfə artmışdır. Əmtəə dövriyyəsinin artırılması üçün hələ böyük ehtiyatlar var. Gələcək iqtisadi-ticari əməkdaşlığın bəzi istiqamətləri barədə fikir mübadiləsi aparılmış, qarşılıqlı tədarüklərin artırılması məsələsi müzakirə olunmuşdur. İnvestisiya sahəsində də böyük perspektivlər var. Beləliklə, ikitərəfli əməkdaşlıqda yeni səhifə açılır ki, bu da xalqlarımızın tərəqqisinə xidmət edir.
Eyvaz Məmmədov,