Dil hər bir xalqın milli kimliyini, tarixini, mədəniyyətini və mənəvi dəyərlərini yaşadan ən mühüm amillərdən biridir. Dövlət dili isə müstəqil dövlətçiliyin əsas atributlarından biri olmaqla yanaşı, ölkənin siyasi, hüquqi və ictimai həyatında birləşdirici rol oynayır. Azərbaycan dilinin dövlət dili statusuna malik olması Azərbaycan Respublikasının müstəqilliyinin, suverenliyinin və milli dövlətçilik ənənələrinin ən mühüm göstəricilərindəndir.
Azərbaycan dili əsrlər boyu xalqımızın zəngin mədəni irsini, ədəbiyyatını və milli-mənəvi dəyərlərini yaşadaraq bu günümüzə çatdırmışdır. Müstəqil dövlət quruculuğu prosesində dil məsələsi xüsusi əhəmiyyət kəsb etmiş, Azərbaycan dilinin dövlət dili kimi qorunması və inkişaf etdirilməsi dövlət siyasətinin prioritet istiqamətlərindən birinə çevrilmişdir. Çünki dövlət dili yalnız ünsiyyət vasitəsi deyil, həm də milli birliyin, vətəndaş həmrəyliyinin və dövlət müstəqilliyinin rəmzidir.
Ümummilli Lider Heydər Əliyev Azərbaycan dilinin dövlət dili kimi möhkəmləndirilməsi istiqamətində mühüm tarixi xidmətlər göstərmişdir. Onun təşəbbüsü ilə 1978-ci ildə Azərbaycan SSR Konstitusiyasında Azərbaycan dilinin dövlət dili kimi təsbit edilməsi milli-mənəvi dəyərlərimizin qorunması baxımından mühüm hadisə olmuşdur. Müstəqillik dövründə isə Heydər Əliyevin rəhbərliyi ilə qəbul edilmiş 1995-ci il Konstitusiyasında Azərbaycan dili dövlət dili kimi təsdiq edilmiş və bununla da dilimizin hüquqi statusu daha da möhkəmləndirilmişdir.
Azərbaycan dilinin dövlət dili kimi fəaliyyət göstərməsi ölkənin bütün idarəetmə sistemində, təhsil müəssisələrində, məhkəmə orqanlarında, kütləvi informasiya vasitələrində və ictimai həyatın bütün sahələrində vahid ünsiyyət mühitinin formalaşmasına xidmət edir. Bu, həm də milli təhlükəsizliyin, milli-mənəvi dəyərlərin qorunmasının və gələcək nəsillərin vətənpərvərlik ruhunda yetişdirilməsinin mühüm şərtlərindən biridir.
Bu gün Prezident İlham Əliyevin rəhbərliyi ilə Azərbaycan dilinin inkişafı və beynəlxalq nüfuzunun artırılması istiqamətində ardıcıl tədbirlər həyata keçirilir. Dilimizin saflığının qorunması, yeni texnologiyalarda tətbiqinin genişləndirilməsi, Azərbaycan dilində nəşrlərin və elektron resursların artırılması dövlət siyasətinin mühüm istiqamətlərindən biridir.
Nəticə olaraq qeyd etmək olar ki, Azərbaycan dilinin dövlət dili olması müstəqil dövlətçiliyimizin başlıca əlamətlərindən biridir. Ana dilimizin qorunması və inkişaf etdirilməsi milli kimliyimizin, dövlət müstəqilliyimizin və xalqımızın mənəvi birliyinin möhkəmləndirilməsinə xidmət edir. Hər bir vətəndaş Azərbaycan dilinə hörmətlə yanaşmalı, onun zənginliyini və saflığını qorumağı özünün vətəndaşlıq borcu hesab etməlidir.
Gülnarə Fərəcova
Saatlı rayon Mərkəzi Kitabxananın əməkdaşı