Azərbaycan Respublikası Gənclər Fondunun dəstəyi ilə Azərbaycanlı Tələbələr və Məzunlar Platforması (ASAP) tərəfindən Türkiyə, Almaniya, Polşa və Macarıstanda 20 Yanvar faciəsinin 33-cü ildönümünə həsr olunmuş silsilə anım günü tədbirləri keçirilib.
Tədbirlərdə 20 Yanvar şəhidlərimizin əziz xatirəsi bir dəqiqəlik sükutla anılıb.
Türkiyənin Yalova şəhərinin mərkəzi meydanında bu şəhərdə olan ASAP nümayəndələri tərəfindən 20 Yanvar şəhidlərimizin fotolarından ibarət foto-sərgi açılıb. İnformativ sərgidə iştirak edənlərə 20 Yanvar faciəsi haqqında məlumat verilib, onların ruhlarına ehtiram əlaməti olaraq şamlar yandırılıb.
Almaniyanın Köln şəhərində yerləşən Azərbaycan Mədəniyyət Evində, Macarıstanın Budapeşt şəhərindəki Azərbaycan Evində və Polşanın Qdansk şəhərində azərbaycanlı tələbə və məzunların iştirakı ilə bu şəhərlərdə olan ASAP nümayəndəlikləri tərəfindən “Qara Yanvar” filmi nümayiş olunub və bədii proqram keçirilib.
Bildirilib ki, 20 Yanvar hadisələri Azərbaycan xalqının müstəqillik mübarizəsində ən şərəfli səhifələrdən biridir. 1990-cı il yanvarın 19-dan 20-nə keçən gecə keçmiş Sovet dövlətinin hərb maşını həm quru, həm də dəniz yolu ilə Bakı şəhərinə həmlə edərək görünməmiş qəddarlıqla keçirilən cəza tədbirlərinə imza atıb. Bu hadisə nəticəsində heç bir günahı olmayan 133 dinc sakin öldürülüb, 744 nəfər yaralanıb, 841 nəfər qanunsuz şəkildə həbs olunub. Həlak olanlar arasında yetkinlik yaşına çatmayanlar, qadınlar və qocalar da var idi. SSRİ Prezidenti Mixail Qorbaçovun göstərişi ilə Sovet ordusunun həmin gün Azərbaycan xalqına qarşı həyata keçirdiyi vəhşi terror aktı insanlığa qarşı törədilmiş ən ağır cinayətlərdən biri kimi bəşər tarixinə qara hərflərlə yazılıb.
Diqqətə çatdırılıb ki, ümummilli lider Heydər Əliyev həmin günlərdə Azərbaycanın Moskvadakı daimi nümayəndəliyinə gələrək xalqımıza qarşı törədilən bu cinayətə etirazını bildirib, təqsirkarların cəzalandırılmasını tələb edib. Sonradan xalqın təşəbbüsü ilə ikinci dəfə siyasi hakimiyyətə qayıdan ulu öndər Heydər Əliyevin təşəbbüsü ilə 20 Yanvar şəhidlərinin xatirəsini əbədiləşdirmək məqsədi ilə Şəhidlər xiyabanında “Əbədi məşəl” abidə-kompleksi ucaldılıb. Həmçinin, Azərbaycan Prezidentinin 2000-ci il yanvarın 17-də imzaladığı Fərmanla 1990-cı il 20 Yanvar faciəsi zamanı şəhid olanlara “20 Yanvar şəhidi” fəxri adı verilib. Bu gün ümummilli liderin layiqli davamçısı Prezident İlham Əliyev tərəfindən 20 Yanvar şəhidi ailələrinin və yaralılarının qayğıları daim diqqət mərkəzində saxlanılır. Dövlət başçısının fərmanlarına əsasən, 20 Yanvar hadisələri zamanı əlil olmuş şəxslər və şəhid ailələri üçün təqaüdlərin artırılması, onların mənzil-məişət şəraitinin yaxşılaşdırılması bu diqqət və qayğının daha bir bariz nümunəsi kimi ictimaiyyət tərəfindən yüksək qiymətləndirilir.
