1992-ci ilin noyabrında Naxçıvanda keçirilən təsis qurultayında Ulu Öndər Heydər Əliyevin rəhbərliyi ilə Yeni Azərbaycan Partiyasının yaradılması ölkənin siyasi tarixində yeni mərhələnin başlanğıcını qoydu.
Həmin dövrdə Azərbaycanın qarşısında ciddi siyasi, iqtisadi və hərbi problemlər dayanırdı. Ölkənin ərazi bütövlüyü təhlükə altında idi, idarəetmədə böhran yaşanır, cəmiyyətdə sabitliyə və güclü siyasi iradəyə böyük ehtiyac duyulurdu. Belə bir şəraitdə YAP-ın yaradılması xalqın sabitlik, inkişaf və güclü dövlətçilik arzularının siyasi ifadəsinə çevrildi.
1993-cü ildə Heydər Əliyevin xalqın tələbi və çağırışı ilə hakimiyyətə qayıdışından sonra Yeni Azərbaycan Partiyası ölkənin siyasi həyatında aparıcı qüvvəyə çevrildi. Sonrakı illərdə dövlət idarəçiliyinin möhkəmləndirilməsi, iqtisadi inkişafın təmin olunması, Azərbaycanın beynəlxalq mövqelərinin gücləndirilməsi istiqamətində ardıcıl siyasət həyata keçirildi.
Azərbaycanın 2020-ci ildə 44 günlük Vətən müharibəsində qazandığı tarixi Qələbə ölkənin siyasi tarixində yeni mərhələ yaratdı. Azərbaycan Ordusunun şücaəti, xalqın həmrəyliyi və dövlət rəhbərliyinin qətiyyətli siyasi iradəsi nəticəsində işğal altında olan torpaqlarımızın böyük hissəsi azad edildi.
2023-cü il sentyabrın 20-də isə Azərbaycanın öz ərazi bütövlüyünü və suverenliyini tam bərpa etməsi ölkənin müasir tarixində daha bir mühüm mərhələnin başlanğıcı oldu. Prezident İlham Əliyev VIII Qurultaydakı çıxışında 8 Noyabr və 20 Sentyabr tarixlərinin Azərbaycanın tarixində xüsusi əhəmiyyət daşıdığını vurğuladı.
Bu gün qarşıda dayanan əsas vəzifələrdən biri əldə edilmiş tarixi Zəfərin nəticələrinin möhkəmləndirilməsi, Qarabağ və Şərqi Zəngəzurun bərpası, keçmiş məcburi köçkünlərin doğma yurdlarına qayıdışının təmin edilməsi və həmin ərazilərdə dayanıqlı həyatın qurulmasıdır.
Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisə olmaqla yanaşı, ölkənin yeni inkişaf mərhələsinə keçidinin siyasi göstəricilərindən biri kimi qiymətləndirilə bilər.
1992-ci ildə mürəkkəb siyasi şəraitdə yaradılan Yeni Azərbaycan Partiyası ötən 34 il ərzində ölkənin siyasi həyatında mühüm rol oynayıb. Partiyanın tarixində Ulu Öndər Heydər Əliyevin dövlətçilik ideyaları və onun müəyyən etdiyi siyasi kurs xüsusi yer tutur. Sonrakı dövrdə bu siyasi xətt Prezident İlham Əliyevin rəhbərliyi ilə davam etdirilib.
Soltanova Zahidə
Saatlı Dövlət Rəsm Qalereyasının bələdçisi