Bakıda, Heydər Əliyev Mərkəzində ümummilli lider Heydər Əliyevin 100 illik yubileyinə həsr olunan Dünyadakı Azərbaycanlı Təbiblərin Simpoziumunun bağlanış mərasimi keçirilib.
“Report” xəbər verir ki, tədbirdə Azərbaycanın səhiyyə qurumlarının rəhbərləri, nazirlər, xaricdə yaşayan və işləyən həkimlər, Azərbaycanda fəaliyyət göstərən beynəlxalq təşkilatların və səfirliklərin nümayəndələri, tanınmış həkimlər, özəl və dövlət tibb müəssisələrinin direktorları və digərləri iştirak ediblər.
TƏBİB-in icraçı direktoru Vüqar Qurbanov çıxış edərək bildirib ki, istər bütün dünyanı cənginə alan koronavirus pandemiyası ilə mübarizədə, istərsə də Vətən müharibəsi günlərində tibb xidməti uğurlu şəkildə təşkil olunub:
“2020-ci ilin əvvəlindən Azərbaycan rəhbərliyi pandemiyaya hazırlıq tədbirlərinə başlamışdı. Vaxtında və düzgün verilən qərarların nəticəsi olaraq Azərbaycan pandemiyanın idarə olunmasında Ümumdünya Səhiyyə Təşkilatının qiymətləndirməsinə görə müsbət təcrübə əldə etmiş ölkələr siyahısındadır. TƏBİB-in tabeliyindəki tibb müəssisələrində yeni laboratoriyaların qurulması, çarpayı fondunun artırılması, təchizat, maddi-texniki bazanın gücləndirilməsi, tibbi kadrların potensialının artırılması, təlimlərin təşkili və sair sahələrdə işlər görülür və görülməyə də davam edəcək. İşğaldan azad olunan rayonlarımızda tibbi xidmətin təşkili sahəsində də işlər görülür. İcbari tibbi sığorta modeli də uğurla icra olunur. TƏBİB-in tabeliyindəki tibb müəssisələrində icbari tibbi sığorta çərçivəsində həyata keçirilən xidmətlər, ümumilikdə, 2550 sayda xidmət olmaqla, geniş və əhəmiyyətli bir spektruma malikdir. Vətəndaşlar icbari tibbi sığorta çərçivəsində 600-dək laborator xidmətdən istifadə edirlər. Bir sözlə, Prezident İlham Əliyevin qayğısı və diqqəti ilə əhatə olunan səhiyyə sahəsində aparılan islahatlar nəzərəçarpacaq dərəcədə artıb. Qarşıya qoyulan hədəflər də çoxdur. Bu istiqamətdə görüləcək işlərdə hazırda Azərbaycanda çalışan həkimlərimiz sırasında gələcəkdə sizləri də görməkdən məmnun olarıq”.
Mərasim bədii hissə ilə davam edib.
